Davao City – Gikawatan ang babaye sa iyang kapuyo usa ka gabii human sila nakahukom nga magbuwag na aron tapuson ang pila na ka tuig nilang panag-uban isip maglive-in partner.
Niini, nagpatabang sa Buhangin PNP si Alyas Dandan, 29 anyos, ug nagpuyo sa Maglana Village, Spring Valley ug sakop sa Barangay Buhangin aron ipadakop ang iyang kapuyo nga si Lenard, hamtong ang pangidaron ug taga-Lupon, Davao Oriental human nga gisikwat niini ang i-Phone nga gi-charge.
Matud ni Alyas Dandan nga sa iyang pagmata alas-5:00 sa buntag sa adlaw’ng Lunes, nawala na iyang cellphone nga naka-charge nianang gabhiona ug wala na sab si Lenard maong dako ang pagtoo niini nga ang misikwat sa naasoy nga cellphone ang iyang kapuyo ra sanglit ikaduhang higayon na Kini gibuhat apan sa unang higayon na-uli ra kaniya ang cellphone nga gikua sa nahisgutang live-in partner.
Si Dandan ug Lenard dunay duha ka anak na, apan reklamo sa nauwahi mao nga tapulan ug walay trabaho ug igo nagpabuhi kaniya si Lenard gawas nga seloso usab kaayo ug mao kining hinungdan nganong nakadisisyon Kini nga buwagan ang irisponsableng lalakeng kapuyo.
Apan ang wala dahoma ni Dandan mao ang paggimaw sa kamot sa pagpangawat ni Lenard sa personal nga gamit sa makaluluoy’ng babayeng nahigugma ug misalig sa sayop nga Lalake kansang igo ra nagpabuhi apan nakahimo pa gyod sa pagpangunay og kawat sa gamit sa biktima nga nag-antos kaniya.
RadyoMaN Joel Viray
