Iligan City – Stable na ang kahimtang sa giilang Icon of Beauty dinhi sa Iligan nga si Ms. Cathy Tan human kini nag-positibo sa Covid 19.
Halos duha ka semana nga nakigbugno sa kamatayon si Tan tungod sa paglisod ug ginhawa human miigo kaniya ang Covid 19.
Saysay ni Tan, pait kaayo ang kahimtang sa hospital nga mag-inusara ug walay pamilya nga mag-atiman nimo samtang lisod kaayo ang imong sitwasyon.
Gani sumala ni Tan, bisan sa iyang ka-arte nga walay hunong sa pagsunod sa mga safety protocols nataptan pa gihapon siya sa nasangpit nga virus.
Hinoon gipaklaro ni Tan nga pila na adlaw na siyang anaa sa ilang balay dihang nakasinati na siya ug simtomas sa Covid 19 hinungdan nga wala na siya’y mga direct contact sa ilang tindahan.
Sa pagkakaron anaa pa sa usa ka pension house si Tan gikan sa iyang pag-gawas sa tambalanan ug naghulat pa sa signal kun kanus-a gayud siya ipabalik sa ilang panimalay.
Tungod niini, mihangyo si Tan sa katawhan nga dili baliwalaon ang pahimangno sa gobyerno batok sa Covid 19 tungod walay pili nga motapot kini ngadto ni bisan kinsa mang indibidwal. (Ghiner L. Cabanday, RMN-DXIC Iligan)
