Davao City – Gisubay na karon sa Police Regional Office Davao Region ang giingong candy drugs nga gibaligya gawas sa mga tulonghaan palibot sa dakbayan sa Dabaw.
Suma ni PRO-11 spokesperson Chief Inspector Milgrace Driz nga samtang mas gipalig-on pa nila ang kampanya sa droga naglusad na sab sila og validation labot sa candy drugs nga gibaligya sa mga eskwelahan sa siyudad karon.
Nasayran nga una nang nabaniog ang candy drugs sa social media diin gitawag usab kini nga strawberry quick ug dunay daghang flavor sa mga prutas ang nasangpit nga candy like nga iligal nga droga.
Subay ani, gitambagan ni Driz ang mga ginikanan ug sa mga school administrators nga monitoron ang mga estudyante sa ilang gipamalit sa mga tindahan gawas sa tulonghaan kay basin ang mapalit mao ang candy drugs.
Tambag usab ni Driz sa mga school administrators na butangan og closed-circuit television cameras ang mga strategic areas alang sa monitoring ug security features sa mga tunghaan.
RadyoMaN Joel Viray
