Giingong laing hugna sa SIM registration gilimod sa NTC-XI

Davao City – Gilimod sa National Telecommunication Commission Davao Region, ang gikatahong dunay laing hugna sa Mandatory Sim card Registration dungan sa pagpaso sa unang 90 days extension sa rehistrasyon pag-abot sa takna sa alas11:59 karong gabii Hulyo 25, 2023.

Matod ni NTC XI Regional Director Nelson Cañete, walay kamatooran ang mikatag nga taho nga adunay laing hugna sa lugway sa sim card registration sugod sa adlaw’ng Miyerkules kon ugmang adlawa Hulyo 26, 2023.

Sigun ni Director Cañete, bisan sa ilang panagpulong sa mga Regional Director sa entero sa nasod nga gipatawag sa NTC Central Office ning bag-uhay lang, wala mahisgoti ang laing hugna sa rehistrasyon sa sim.

Napahigayon ang 90 days extension sa rehistrasyon, tungod ang mga telecommunication companies mismo ang nangayo niini, hatod sa kadaghan sa ilang mga subscribers nga wala makapa-rehistro, dugang pamahayag sa Opisyal.

Gibatbat pa sa Kanhi Broadcaster, kung ang gobyerno lang pabut-on wala na unta’y ihatag nga extension, aron dili magdasa ang kadaghanan sa pagsanong sa Mandatory Sim card Registration.

Kini nagpasabot nga sugod sa 12:00 sa tungang kagabhion ugma sa adlaw’ng Miyerkules, ang tanang simcard nga wala marehistro, awtomatikong ma-deactivate na. Ang tanang apps ug mga contact ang dili na kini ma-access pa sa mga subscribers.

RadyoMaN Joel Viray