Giingong ukay supplier, alegasyong nakapamiktima og dul-an 20 ka indibidwal

Davao City – Gilayong nagpatabang sa otoridad ang giingong usa sa mga nabiktima og scam sa usa ka ukay-ukay bundle supplier sa dakbayan.

Sa chat interview sa DXDC RMN Davao kang alyas “Maymay,” taga-Oroquieta, Misamis Occidental, gibutyag niini nga anaa sa P10,000.00 ang kwarta nga giingong na-scam human ikaduha kini naghatag og bayad pinaagi sa online nga transaksyon isip down payment. Gani, matud pa, hangtod karon walay order o bundle nga na-deliver kaniya.

Dugang ni Maymay nga atol sa gilusad nga tracing uban ang otoridad, nasayran nga daghan og namugna nga page ang giingong scammer.

Samtang, gawas sa na-scam, aduna sab naangin nga laing negosyante sa dakbayan sama ni alyas “Jina” tungod sa pag-ilis-ilis og pangalan sa social media sa giingong scammer, nga duol sab sa laing negosyante. Gani, dugang butyag ni Jina nga dul-an 20 na ka indibidwal ang mireklamo human mabiktima sa giingong scammer.

Sa karon, ginapangita na matud pa ang maong scammer aron mahunong ang dili maayong binuhatan ug ang alegasyong pagpang-scam.

RadyoMaN Kareen Beltran