Polomolok, South Cotabato–Patay ang usa ka gikaingong miyembro sa local terrorist group sa gipahigayong buy-bust operation sa hiniusang pwersa sa Polomolok Municipal Police Station, SCPMFC-SCPPO ug 10th SF Intelligence Operative sa 5th SF Battalion sa pakig-alayon sa PDEA 12 sa Purok Pag-Asa, Brgy Lumakil, Polomolok, South Cotabato, alas 03:10 sa hapon, niadtong nakalabayng adlaw.
Ang suspek giila sa pangalan nga us aka Mohalidin Marot alias Alimudin Marot, hingkod ang pangidaron, usa ka tricycle driver ug residente sa Brgy. Lumakil, Polomolok, South Cotabato. Subay sa pahayag sa Polomolok PNP, nakamatikod matud pa ang suspek nga Police ang iyang nakatransaksyon mao nga mibunlot kini ug pusil dayon gipamusil ang operating team apan paspas nga nakabalos ang otoridad mao nga napusilan ang nahisgutan. Gilayong gidala sa Polomolok Municipal Hospital, ang suspetsado apan gideklara kini nga dead on arrival sa attending physician.
Nakuha sa lugar ang usa ka unit nga kalibre 45 nga armas nga kargado ug 3 ka buhing bala, sling bag, usa ka unit sa Kawasaki Bajaj, P500.00 nga buy-bust Money ug 4 ka heat sealed transparent plastic cellophane sa suspected āshabuā nga gibana-banaang anaa sa kantidad nga P6, 860.00 . Subay usab sa report nga gipagula sa South Cotabato Police Provincial office, ang suspek miyembro matud pa sa Daulah Islamiyah-SOCSARGEN Khatiba ug gikonsiderang spotter sa maong local terrorist group nga nagamonitor sa deployment sa PNP personnel ug AFP.
