Gi-raid sa militar ang kampo sa usa sa criminal group nga ilang nadiskubre samtang nagpahigayon og clearing operation niadtong Sabado sa buntag, Agosto 17, sa may Barangay Karkum, sa lungsod sa Sapad, Lanao del Norte.
Matud ni LtCol. Rolando Orengo, commander sa 5th Mechanized Battalion, Philippine Army, gipanguluhan sa usa ka Norjamal Tomarompong ang nasangpit nga grupo kinsa adunay kalambigitan sa mga krimin nga sama sa pangpangidnap, pagpatay ug pag-pangholdap.
Si Tomarompong adunay gi-atubang nga mga kaso ug adunay standing warrant of arrest.
Ang nasangpit nga kampo o kuta sa grupo, nga nahimutang tulo hangtud upat ka kilometro ang gilay-on gikan sa mga kabalayan, “well-fortified”, matud pa ni Orengo, ug aduna pay mga running trenches ug foxholes nga mahimong nilang tagoan.
Nakapinusilay pa sa 5th Mech ang grupo apan naka-ikyas ang kapin kun kulang 20 ka mga armadong sakop niini.
Nakuha sa mga sundalo gikan sa encounter site ang usa ka M14, usa ka M16, duha ka garrand rifles, usa ka rifle grenade ug mga magazine og bala.
Walay nasamdan o namatay sa military apan posibleng adunay samara o casualty sa mga armado tungod sa mga dugo nga nakit-an sa ilang gi-agian samtang miikyas. (Divina M. Suson)
PHOTO COURTESY
5th Mechanized Battalion, Philippine Army
