Nakaangkon og bun-og ug mga gasgas sa ilang lawas ang inahan ug anak human maigo sa mga nabungkag nga semento ang ilang gipuy-an tungod sa pagkabangga sa sakyanan, pasado alas-11:00 sa gabii, sa Purok 18, Barangay Poblacion, Manticao, Misamis Oriental.
Sa report sa kapulisan sa Manticao, nagbiyahe gikan sa Iligan City paingon ngadto sa direksiyon sa Cagayan de Oro City si Radijed Alibanggo, 33 anyos, anak ni Art Alibanggo, negosyante ug kanhi kandidato sa pagka-konsehal sa Iligan niadtong nakalabay’ng piniliay.
Gidaro sa Toyota Vios ni Alibanggo ang sala nga bahin sa pinuy-anan sa pamilyang Hermoso kung asa natulog ang inahan sa pamilya ug tulo ka mga gagamay’ng anak niini.
Napangos sa ulo ug uban pang bahin sa iyang lawas ang onse anyos nga anak sa tagbalay tungod sa mga debris sa semento sa dingding nga nabungkag ug nangalagpot paingon ngadto sa mga nangatulog. Daling gidala sa tambalanan sa Manticao ang bata ug anaa na kini karon sa luwas nga kahimtang apan kinahanglang ipailawom sa x-ray ug uban pang laboratory check-up karong adlawa.
Ang inahan sa pamilya nga si Elizabeth Hermoso, 48 anyos, nakadiskubre sa iyang mga bun-og sa tiil ug panakit sa ulo, kagahapon nalang sa hapon, tungod sa pagka-igo sa iyang makina sa panahi nga milamba ngadto kanila.
Ang driver nga si Alibanggo suwerte nga walay injuries nga naangkon.
Miingon ang anak sa ni Hermoso nga si Lenie, kinsa natulog sa kuwarto, nga nadunggan niya ang paglamba ug kalit nga mihilak ang iiyang manghud tungod sa sakit sa mga semento nga mitabon ngadto sa bata.
Gi-angkon, matud pa sa driver, nga nakatulog siya samtang nagmaneho.
Hinoon, gipasaylo ug nagkasinabot ra ang pamilya Hermoso ug si Alibanggo nga dili kini kasuhan tungod kay aksidente ang nahitabo.
Apan ipa-ayo ni Alibanggo ang naguba nga balay, pulihan ang electric sewing machine nga maoy gamit sa panginabuhian sa pamilya ug bayaran ang pagpatambal sa mga na-injured.
