Gin-alegar outbreak sang Hepatitis C sa Bacolod Queen of Mercy Hospit, pa-imbestigahan sa Department of Health

16

Ginpanugyanan ni Councilor Cindy Rojas, chairman sang Committee on Health sa Sangguniang Panlungsod sang Bacolod, ang Bacolod Queen of Mercy Hospital nga magdihon sang incident report kag ipasa ini sa Department of Health agud ma-imbestigahan ang gin-alegar outbreak sang Hepatitis C sa ila nga hemodialysis facility.

Ini kasunod sang pag-infect sang Hepatitis C sa 76 ka mga pasyente nga nagpa-dialysis sa amo nga hospital humalin sadtong Hunyo kun sa diin duha ang ginbawian sang kabuhi.

Kahapon, naghiwat sang committee hearing sa pagpamuno ni Rojas, nga gintambungan sang tiglawas sang mga tagreklamo nga pasyente kag sang hospital kun sa diin naplastar ang problema apang wala matumod kun sa diin naghalin ang virus.


Ginplastar sang BQMH nga ginpaidalom sa test ang ila mga personnel kag lunsay nag-negatibo ang mga ini sa amo nga balatian.

Suno kay Councilor Rojas, maga-renew sang ila lisensiya ang hospital kun sa diin maga-abot ang mga tiglawas sang DOH agud mag-tsekyar sang ila pasilidad kag mangin kahigayunan ini agud paimbestigahan ang gin-alegar outbreak.

Samtang sa wala pa, ang BQMH nagtanyag sang libre nga konsultasyon kag bulong sa infected nga mga dialysis patients.



Ang Hepatitis C isa ka liver infection nga tuga sang hepatitis C virus, nga sarang makuha paagi sa contact sa dugo sang isa ka tawo nga infected sini. (PNA Photo)

Facebook Comments