Roxas City, Capiz- Gintukod sining karon lang ang duha ka mga grupo nga magapatigayon sang evaluation sang mga Municipal kag City Peace and Order Council subong man sang Municipal kag City Anti-Drug Abuse Council sa probinsya sang Capiz.
Sa ginpatigayon nga tingob nga sinapol sang Provincial Peace and Order Council kag Provincial Anti-Drug Abuse Council nga ginpamunuan ni Governor Antonio Del Rosario, gin-apruban ang pagtukod sang duha ka separado nga Audit Team para sa pagpatigayon sang evaluation ukon audit para sa tuig 2017.
Tinutuyo sang amo nga tikang nga masekyar ang mga ginahimo nga mga hilikuton kag programa sang amo nga mga konseho agud mapabaskog kag mapabakod ang ila kampanya tuhoy sa siguridad kag kontra sa ginadumilian nga droga.
Ang PPOC audit team ang pagapamunuan sang Gobernador, sa diin, mahimo sya magpahamtang sang iya alternate.
Mangin myembro diri ang tiglawas gikan sa DILG, Philippine National Police, Civil Society Organization kag isa ka katapo sang POC, sa diin gindesignar sang Gobernador ang Philippine Information Agency.
Samtang ang Audit Team para sa Anti-Drug Abuse Council ang pagapamunuan sang DILG kag mangin myembro man diri ang tiglawas sang PNP, PDEA kag duha ka representante gikan sa civil society organization.
Jemin B. Guillermo/PIA6-Capiz
