“Kahimu-an sang mga kalag nga wala makasaka sa langit”- ini ang pagpati sang isa ka iloy matapos nga ginpossess ang duha niya ka anak sa sulod sang isa ka buluthoan sa Banwa sang Miagao, Iloilo.
Suno sa isa ka iloy nga gintago lang sa pangalan nga Lorna, una nga ginpossess ang iya grade 7 nga anak kag sunod naman ang grade 9 student apang natigayun ini nga maumpawan sang gindala sa simbahan kag gin-pray over.
Basi sa masaligan nga inpormasyon nga nakalab-ot sa RMN Iloilo, duha ka magkasunod nga adlaw sang biyernes natabo ang pagsulod sang ginapatihan mga espiritu sa mga estudyante. Biyernes sang nagligad nga semana naglab-ot sa 23 ka estudyante ang ginsaniban kag 9 naman sang nagligad nga adlaw sang lunes.
Dugang pa, nag-umpisa ang nasambit nga insidenti matapos ang ginpatigayon nga blessing kag inauguration sa bag-o nga hulot klasehan sang ginbendisyunan sang pari ang palibot sini.
Sa pihak sini, ginpanginwala naman sang mga school official nga may napatay sa isa sa mga estudyante nga nabiktima kag ginklaro nga indi possess ang natabo, sa baylo gin-atake lamang sang hapo ang mga ini bangud sa mainit nga panahon.
Wala naman ang eskwelahan naghatag sang opisyal nga pahayag may kaangut sa insidinte.
