General Santos City—Samad sa Kilid ang naangkon sa ginang nga itago lang sa panglang Alias Helen, 42 anyos nga taga Maitum, Sarangani Province ug temporaryong nagpuyo sa Purok 6, Barangay Ligaya, Gensan human kining gidunggab sa iyang bana gamit ang screw driver alas 2:30 ang takna sa kaadlawon.
Sumala sa ginang atol sa pakighinabi sa DXMD-RMN Gensan news Team, adunay okasyon sa balay sa ilang anak, human matud pa ug panghipos iyang gihagad ang iyang bana nga maghigda.
Samtang naghigda, buot makighilawas ang bana ngadto sa biktima apan namalibad kini gumikan sa kakapoy sa iyang lawas human sa okasyon sa iyang anak.
Gikasuko martud pa kini sa iyang bana diin misangko sa panaglalis ang tanan. Apil usab nga gipahimungtan sa suspek ang ilang anak nga lalaki diin hapit sab niya kining tigbasa.
Nadunggaban ang ginang sa iyang kilid kansa gidala dayon sa ospital samtang ang suspek nadakpan sa kapulisan nga sakop sa Police station 3 atol sa ilang pagrespondi sa lugar.
Dugang pa sa ginang nga dili kini ang unang higayon ngna siya gipasakitan sa iyang bana, sanglit pirmi siyang kulatahon niini.
