Davao City – Nagpatabang ang usa ka ginang sa Sasa PNP human gihulga sa babaye nga dunay diperensiya sa pangutok nga patyon ang tibuok nilang pamilya.
Wala na maglangay si Lilia Montegrande ug gilayon kini midangop sa Presinto 4 aron ipatala ang panganti ni alyas Ara nga puhuon ang ilang pamilya kung dili muhawa sa ilang gipuy-an sa Doña Asuncion, Barangay Pampanga ning dakbayan.
Saysay ni Lilia, kalit miabot sa ilang gipuy-an si Ara ug nag-iskandalo ug nagbuhi og ngil-ad nga mga pulong nga nagbutang kanila sa kaulaw ug dayon nagbahad.
Segun sa ginang nga base sa kasabutan nga sa katapusan pa sa buwan sa Marso karon tuiga mupahawa sila sa luna sa compund kung asa nakatikad ang ilang panimalay.
Ang Sasa PNP misugyot ngadto sa biktima nga dad-on una ang reklamo sa barangay level aron didto husayon ang miulbo nga bangi tali kanila.
RadyoMaN Joel Viray
