Davao City – Patay ang usa ka ginang human pusila sa tulo ka higayon sa wala mailhing mamumuno sa may Lanang gahapon sa hapon.
Wala na madala sa balay-tambalan ang biktima nga si Lolita Planas, 53-anyos, ug nagpuyo sa Nova Tiera Village, Brgy. Hizon, Lanang ning siyudad tungod sa pagkapatal og pagtiro sa mga suspek.
Usa ka Eliza, residente sa dapit, nagbutyag sa kapulisan nga nakabati kini og sunod-sunod nga buto sa pistol alas-3:10 sa hapon gikan sa dalang Avenido sa maong lugar.
Ug mao na lamang nakita niini ang pagkahagba sa biktima human luthanga sa suspetsado gamit ang .45 nga pistola.
Paspas misibat ang mamumuno dihang nasiguro na niini nga wala nay kinabuhi ang biktima.
Matud ni Sho Planas, anak sa biktima, nga duna matud pay gikasohan ang iyang inahan nga usa ka Sheila Manzanarez nga taga-Tibungco gumikan sa pakyas pagtuman sa ilang kasabutan niining tuiga.
Sumala ni Sho, gitugyanan matud pa sa iyang inahan si Sheila sa titulo sa ilang luna lakip na salapi alang sa processing fee.
Apan dili pa sab masulti sa Sasa PNP kun makunsidera na ba nga person of interest sa kaso si Sheila hinoon mao usab kini ang usa sa gisubay sa mga otoridad.
RadyoMaN Joel Viray
