General Santos City—sikop ang usa ka ginang sa gihimong buybust operation nga gilusad sa operatiba sa City Drug Enforcement Agency (CDEU) sa area sa Prk. Talisay, Barangay Lagao Gensan.
Suspek nailhang si Lucell Aboso, legal age, residenti sa samang lugar. Alas 5:00 ang takna sa hapon, Martes, June 20, 2017 dihang gipahigayon ang buy-bust operation batok sa suspek didto mismo sa ilang panimalay kung asa napalitan kini ug (1) ka sachet sa gituohang shabu gamit ang buybust money kantidad ug P500.00. Gilayon kining gisikop ug giturn-over sa Police Station 3.
Sumala ni Police Sr. Inspector Fernando Manuel Jr., Hepe sa CDEU nga gihimo nila nag operasyon human silang nakadawat ug report bahin sa iligal nga aktibidad sa suspek.
Hugtanong gihimakak usab sa ginang ang aligasyong sya lambigit sa iligalnga druga. Sumala niini nga wala sya napalitan sanglit planted matud pa ang ebidensyang gipasangil ngadto kaniya.
Nakurat lang kini dihang miabot matud pa ang mga tawong nakasibilyan, misulod sa ilang panimalay dayon nang ukay sa ilang mga gamit. Didto na dayon may usa ka sachet sa gituohang shabu nga gipakita ngadto kaniya nga nakugha matud pa sa iyang gibutangan sa iyang Sr. Sto. Niño.
Depensa sa kapulisan nga normal lang nga manghimakak ang suspek sa iligal nga aktibidad nga iyang gikalambigitan. Gipaniguro usab sa mga nahisgutan nga lihitimo ang ilang operasyon.
