Sang nagligad nga kaagahon Oktubre 27, ala una, may isa ka matahum nga babayi nga nagpapara sang taxi. Ang babayi nagpanaug halin sa L300 van nga posible ang pasahero halin sa Manila, alog ang babayi nga ini kag gin transaksyon ang driver nga mapadul m-ong sa Leon, Iloilo.
Si Joemar, 10 ka tuig na nga naga drive sang taxi amo ang nagdulog sa iya sang ini ang magpapara malapit sa plaza sang Jaro. Matahum ang lin-ay kag nakasuksok sang batik nga sa iya pagsugid 28 anyos ang iya edad.
Sa sulod sang taxi halin Jaro pakadto sa Leon, wala gid nagahambal ang pasahero humalin nga nag transaksyon ini sa driver kag nagsugot sa 500 pesos nga kontrata. Pag-abot malapit sa banwa, nagmuno ini nga may kakilala kag tiya nga naga istar sa boundary sang Tigbauan kag Leon. Didto nag deretso ang driver sa tuyo nga makabulig sa naalangan sa oras nga pasahero.
Masami nga nagapasiplat si Joemar sa babayi nga tuman ka puti kag bag-o ini manaog sa taxi pag abot sa lugar, lugar nga wala sang pamalay, may kasagingan nga mga kahoy, naatubang niya ini kag natalupangdan niya nga wala sang kanal-kanal ang naibabaw nga bibig sang babayi. Wala niya ini ginhatagan sang igtalupangud bangud naghambal ang babaye nga manaog anay ini kay pangitaon niya ang balay sang iya tiya sa pulong nga tagalog.
Ginbilin sang babayi ang plastic bag nga dala nga may unod nga pila ka nahut nga panapton kag isa lang ka panid nga tsinelas. Naghambal sya nga mabalik lang gilayon apang mga 20 minutos na ang nakaligad kag wala pa ini makabalik. Una na nga ginkulbaan ang driver bangud sang manaug ang babayi, iya pa nakita ini apang pagkaulihi nadula ini sang hinali sang maglabay sa daku nga kahoy.
Wala na nag uyang sang panahon si Joemar, ginpaburhot ang iya salakyan nga wala na bulubalikid bangud sadto lang nga tion nagsulod sa iya huna-huna nga posible tamawo ang babayi nga ato. Nagbalik sa iya pinsar nga iya gali nakita nga wala sang kanal-kanal ang naibabaw nga bibig sang babayi.
Ang mga upod nga taxi driver ni Joemar nagapati sa iya ginpanugid bangud suno sa ila, sila man may naagyan nga kaangay sadto. Madumduman nga sang nagligad nga tinuig, may taxi driver man nga nagdul-ong sang babayi nga pasahero sa Guimbal, may balay nga daku nga may gate nga gin abrihan pa sang guardya, sa paggwa sang taxi iya ginbalikan para agyan liwat ang daku nga balay, apang daku na lang nga kahoy ang iya nakit-an.
Sa subong nga tiempo, mapati pa bala kamo sa kasubong nga istorya ukon may gal-om na sang pag pangduha-duha sa inyo huna-huna?
