Roxas City, Capiz- Wala ginpasulod sang security guard sang St. Anthony College Hospital ang mga imbestigador sang Roxas City PNP nga sanday SPO1 Maichael Capapas kag SPO1 Rodel Ebañes.
Suno sa mga ini, sila ang gindumilian ni S/G Arman Flores nga makasulod sa amu nga ospital alas 11 sang aga sang nakaligad nga Hulyo 20, 2018.
Ini matapos nga gin-request nila ang kopya sang CCTV footage sang tiun nga gindala ang biktima nga si Jhonel Arches y Cawaling sa amo nga ospital.
Base sa pagparekord sang duha ka PNP personnel, naka-schedule kuntani ang mga ini sa biktima nga si Jhonel Arches y Cawaling nga kuhaan sang sworn statement sang kapulisan sa nasambitan nga adlaw angut sa natabo nga pagkaluthang sa iya.
Sa madumdoman, alas 5:45 sang hapon sang Hulyo 16, 2018 sa Villa Alegria Brgy. Punta Tabuc natabo ang pagluthang sa biktima kun sa diin ini ang napilasan sa tiil kag tuhod. Suno diri, nga wala niya makilala ang ginapahayag suspek.
Sa subong, wala pa sang klaro nga imbestigasyon ang kapulisan tuhoy sa motibo sa pagkaluthang sa biktima.
May kaangut nagpahayag sang pagkadismaya ang hepe sang Roxas City PNP nga si Police Supt. Dante Tayco bangud sa amo nga insidente.
Samtang ginahulat naman ang opisyal nga pahayag sang pamunoan sang nasambitan nga ospital.
