GINBAHA | 24 ka mga barangay ginbaha bangud sang pagbuhos sang ulan dala sang Bagyong Urduja; Capiz ginpaidalom sa Tropical Cyclone Warning Signal No. 1

CAPIZ – Naglab-ot sa 24 ka mga kabarangayan ang ginabaha sa probinsiya sang Capiz kasunod sang pagbuhos sang ulan humalin pa sang nagligad nga adlaw sang Martes dala sang LPA nga nangin Tropical Depression Urduja.
Base sa pinaka-ulihi nga report nagikan sa Provincial Disaster Risk Reduction and Management Office (PDRRMO-CAPIZ), ginbaha ang 16 na ka mga kabarangayan sang Sigma, anum naman ka mga barangay ang ginabaha sa banwa sang Mambusao, kag tatlo sa banwa sang Panay.
May mga dalanon man sa mga kabarangayan nga indi maagyan bangud gintaup sang tubig baha. Nagdangat naman sa kapin 80 ka mga poluy-an ang naapektuhan sang pagbaha.
Dako naman nga posibilidad nga madugangan pa ang mga apektado nga mga barangay kun magpadayon ang pagbuhos sang ulan sa mga kabanwahanan.
Base sa forecast sang pag-asa, nalakip na sang probinsya sang Capiz sa mga lugar nga ginpaidalom sa Tropical Cyclone Warning Signal No. 1 bangud sang bagyong Urduja.

Facebook Comments