LA CARLOTA CITY, NEGROS OCCIDENTAL – Ginbalusan sang isa ka pamilya, ang isa ka pamatan-on pinaagi sa pagtiro sa iya sang sulpak kahapon sang hapon sa Brgy. Ara-al, ciudad sang La Carlota bangod gid lamang kay ginbakal sang iya magulang ang isog sang isa ka miembro sang pamilya Portante nga nagmaoy kag panghangkat away sa barangay.
Nakilala ang biktima nga si Jason Beraño, 18 anyos ang edad, pumuluyo sang Had. Dos Marias, Brgy. Araal, La Carlota City.
Suno sa biktima nga may mga las 2:30 kahapon sang hapon, durante nga ini siya ang nagalakat sa dalan halin sa balay sang iya nobya, may nasugata ini siya nga apat ka mga tawo.
Ini nga mga tawo ang nakilala sang biktima bilang miembro sang pamilya Portante, Jerry, 53; Jomarie, 30; Gerald, 28; Gereck, 23; nga sadto nakaaway kag kontra sang iya magulang.
Antis pa man sina, nagmaoy si Gerald sa diin nagapanghangkat ini away tubtob nga may nagbakal sang iya isog, nag-abot ang magulang ni Jason nga si Robert Beraño.
Dira na sila nag sumbaganay kag sang nadehado si Gerald, nagdalagan ini sa ila balay kag nagpangayo sang back-up sa iya kauturan.
Imbes nga si Robert ang balusan, ginpahayag ni Jason nga nakibot na lamang siya sang ini ang gintiro sang isa sa ila nga iya na-identify nga amo si Joemarie Portante gamit ang 12 gauge shotgun.
Nag-angkon sang pilas sa nawala nga tuhod ang biktima kag padayon karon nga ginabulong sa Corazon Locsin Montelibano Memorial Regional Hospital.
Arestado naman si Jerry, Jomarie kag Gereck samtang ang nagmaoy kag nagpangita inaway bangod kay isog nga si Gerald ang una naman palagyo kag at large./dyHB BACOLOD
