GINBUNGGUAN | Isa ang patay kag tatlo pilason matapos binungguan sang Toyota Revo ang duha ka Motorsiklo nga una nagbunggu-anay sa banwa sang Lambunao.

Isa ang patay kag tatlo ang pilason matapos ginbungguan sang Toyota Revo ang duha ka motorsiklo nga una nagbunggu-anay sa Barangay Maite-Pequeño, Lambunao alas 8:30 subong nga gab-i.
Ginkilala ang napatay nga si Sulpicio Los Bañes Jr., sang Barangay Aglibacao, Calinog nga dead on arrival sa Lambunao District Hospital.
Samtang ang mga pilason amo ang backrider ni Los Bañes nga si Rey Derecho, 51 anyos sang Barangay Pasig, Lambunao kag ang magka-angkas man sa isa ka motorsiklo nga sanday Jose Elmer Subong, 52 anyos sang Barangay Pasig, Lambunao kag April Love Latoza, 40 anyos sang barangay Caninguan, Lambunao.
Ginpahayag ni PO1 Rizan Larroza sang Lambunao PNP nga halin sa banwa sang Calinog ang motorsiklo nga ginasakyan nanday Los Bañes kag Derecho sang makabunggo ini sa motorsiklo nga ginasakyan naman nanday Subong kag Latoza pag-abot sa Barangay Maite Pequeño, Lambunao.
Bangud sini, pareho nga natumba ang duha ka motorsiklo apang wala man sang malain nga natabu sa mga sakay kag sang tuyo na nga magtindug ang mga ini, gulpi man sila nga ginbungguan sang Toyota Revo nga ginamaneho ni Rian Libuna, 36 anyos sang Barangay Walang, Lambunao.
Nakaagum sang pilas sa ulo si Los Bañes nga gintunaan sang iya kamatayon samtang luwas naman sa katalagman ang tatlo ka napilasan.
Boluntaryo naman nga nagsungka sa Lambunao PNP ang driver sang Toyota Revo kag magapangatubang sang nagakaigo nga kaso.

Facebook Comments