Roxas City, Capiz – Patay na sang gindangat sa Roxas Memorial Provincial Hospital ang 24-anyos nga lalaki matapos ginbuno sang isa ka miyembro sang pamilya sang iya nga kalive-in partner sa Barangay Dumolog, Roxas City mga 5:20 kahapon sang hapon.
Ginkilala ang biktima kay Ahran Sare, residente sang Arnaldo Blvd., Barangay Baybay, syudad sang Roxas. Sa inisyal nga imbestigasyon sang mga kapulisan, nagpadulong ang biktima sa balay sang iya kalive-in partner nga si Karen Ardeño agud tuyo nga sugaton ini, apang nagpamalibad nga mag-upod ang babaye.
Naakig si Sare kag nagluntad ang pagsabtanay sa tunga sang maglive-in partner. Ginpilit gid kag gin- harass ni Sare si Karen kag ang utod sini nga babaye gamit ang ginabitbit nga armas luthang.
Nakita sang suspek nga si Nelson Candido ang ginahimo ni Sare sa iya asawa kag bayaw, rasun nga nagpalapit ini kag ginbuno ang biktima sang makapila ka beses. Nag-angkon sang madamo nga pilas sa tiyan ang biktima nga si Sare nga amo naman ang gintunaan sang iya kamatayon. Madasig naman nga nagpalagyo ang suspek pagkatapos sang krimen.
