Nadalahig sa gamo ang grupo ni PBA player Jeron Teng kaina sang kaagahon sa Fort Bonifacio Global City sa Taguig City.
Kalakip ang Alaska aces player nga nakaagum sang buno sa lawas kag ginabulong karon sa St. Lukes Medical Center.
Magluwas kay Teng, kalakip sa nabun-an sanday Norberto Torres kag Christopher Torres nga lunsay man nga anay players sang La Salle.
Sa imbestigasyon sang Southern Police District, ginapahayag nga nagalakat ang grupo ni teng sa guwa sang isa ka night club sa BGC sang gulpi lang sila nga ginsita sang mga suspek nga nangin kabangdanan sang pagluntad snag mainit nga pagbaisay nga nagresulta sa kinagamo.
Suno sa utod ni Jeron nga si Jeric Teng nga isa man ka PBA player sang Global Port, nakaangkon sang igu sang pagbuno sa likod kag kilid ang iya utod kag bisan ang duha sini ka upod nga sanday Norberto kag Christopher Torres.
Suno kay Jeric nga maayo lamang kay wala maigo sa vital organ ang iya utod.
Arestado naman ang duha ka suspek nga sanday Edmar manalo, isa ka US Citizen, general construction contractor kag si Willard Basil sang Muntinlupa kag isa ka construction inspector.
Kaso nga frustrated homicide kag less serious physical injuries ang igapasaka sang PNP batuk sa mga suspek.
