Roxas City, Capiz – Nasapwan sang mga residente ang isa ka patay nga lapsag nga nagalutaw-lutaw sa suba nga nasakupan sang Brgy. Banica, Roxas City mga alas 11:00 kaina sang aga. Suno sa pagpahayag ni Rudy Lara, nakita sini ang plastic nga nagalutaw samtang ini ang nagapanguha sang tuway sa amo nga suba.
Sang ginpalapitan sini, nagtampad sa iya ang isa ka Rosarito nga nakahigot sa amo nga plastic. Nakita man sini ang bato nga nakahigot sa plastic nga gin gamit bilang pamato agud maglugdang ini. Bangud sa katingala ni Lara, ginpasaka sini sa higad sang suba ang amo nga plastic kag nagpanawag sang iya mga kahilapit.
Makaligad ang pila ka minutos nagresponde ang mga katapo sang Capiz Emergency and Response Team ukon CERT kag ginbukad ang amo nga plastic. Nakasulod sa amo nga plastic ang isa ka plastic box sang ice cream nga napalibutan sang packing tape kun sa diin nakasulod didto ang lapsag kag may hapin nga panapton.
Kompleto na ang nasambit nga lapsag nga ginabulubanta nagapang-edaron na sang 7 tubtub 8 ka bulan. Yara pa ang pusod ka mga inunlan sang amo nga bata. Sa karon, yara na sa isa ka punerarya ang amo nga anghel, matapos gindala sang mga katapo sang SOCO kag Roxas City PNP.
