Roxas City, Capiz – Gin-release na sa kostudiya sang Jamindan PNP ang 39-anyos nga si Teller Glorian y Marcelino, ang suspek sa pagluthang-patay sa iya mismo kaupod sa pagpapangayam sang baboy – talunon sa Barangay Agbun-od banwa sang Jamindan.
Ini makaligad nga nagtapos na ang ‘reglementary period’ sa pag-detain sa suspek kag nag-file man sang ‘affidavit of non interest’ sa pagpasaka sang kaso ang pamilya sang biktima nga si James Valaquio y Villasis, 27 – anyos ang pang-edaron.
Samtang gin-dismiss man sang korte ang ginpasaka nga kaso sang kapulisan nga paglapas sa R.A 10591 ukon Comprehensive Firearms and Ammunition Regulation Act batuk kay Glorian.
Matandaan, ginpahayag ni Police Staff Sargeant Jerson Vigo sang Jamindan PNP, nga alas 8, Martes sang aga sang nag – umpisa sa pagpangayam ang biktima kaupod ang suspek nga ‘igsuon’ sini.
Nagsugtanay ang mga ini nga magbulag agud nga ayamun ang baboy – talunon sa kondisyon nga indi maglapaw ang mga ini sa isa ka lugar nga ginakabig nila ‘restricted’.
Ginsiling sang suspek nga wala ini naghuna-huna nga si Valaquio ang yara sa restricted area kag ini ang iya nasal-an nga baboy – talunon gani insigida nga ginluthang ang porsyon sang lugar kun sa diin may nagakalas.
Nag-angkon sang pilas malapit sa hawak ang biktima gamit ang 12 – gauge homemade shotgun.
Bangud nga malayo ang lugar sang insidente kag patal nga pilas nga naangkon, wala gid matabangan ang amo nga biktima.
