Arestado ang 19 anyos nga traysikol driver matapos ginhimuslan ang 8 ka tuig nga bata sa isa ka lugar sa probinsya sang Guimaras.
Natabo ang insidente kahapon sang hapon , Hulyo 17.
Suno kay PO3 Mary Jean Song sang Women and Children’s Protection Desk (WCPD) , ginpasakay sang suspek ang 8 ka tuig nga biktima nga si alyas Inday sa iya traysikol upod ang 3 ka iban pa nga mga kabataan alas 4:30 kahapon sang hapon agud idul-ong sa ila tagsa ka balay.
Ginpahayag ni Song nga una gindul-ong sang suspek ang tatlo ka mga kabataan kag ginpa-ulihi si alyas Inday.
Apang imbes nga idulog sa balay ni Inday, nagderetso ang traysikol kag gindala sang suspek ang biktima sa masi-ok nga lugar kag ginhimuslan.
Suno pa kay Song nga gindul-ong sang suspek si Inday sa ila balay pasado alas 6:00 na sa gab-i.
Gilayon nga nanugid ang biktima sa iya iloy kag ginreport sa kapulisan rason nga nadakpan ang suspek .
Base sa resulta sang medical examination, nakumpirma nga ginhimuslan sang suspek ang 8 ka tuig nga biktima nga nagtuga sang pagdugo sa kinatawo ni Inday .
Yara na sa kustodiya sang kapulisan ang suspek kag nagapangatubang sang kaso nga rape.
Suno kay PO3 Song, may live-in partner ang 19 anyos nga traysikol driver kag todo ang panginwala nga iya ginhimuslan ang biktima.
( Wala ginbutang ang pangalan sang biktima kag sang suspek pati ang lugar sa diin natabo ang insidente agud maprotehiran ang identity sang 8 ka tuig nga bata.)
(photo from web)
