Davao City – Dili na mupasaka og kaso ang pamilya sa babaing namatay human miabak sa gisakyang motorsiklo sa Seminary Drive, Magugpo West Tagum City, Davao del Norte.
Sa interbyu sa DXDC RMN Davao Police Lt. Colonel Ariel Acala, Officer in Charge (OIC) Tagum City Police Office, giila ang biktima nga si Lanie Bell Casigluman, 20 anyos, taga Bermudez, Tagum City.
Sa imbestigasyon nasayran, nagsakay ang biktima sa motorsiklong gimaneho sa boyfriend niya nga si Brylle Jayson Jimenez, 23 anyos sa dihang kalit na lamang nagkalalis ang duha nga miresulta sa pag-ambak sa biktima og pagkabagok niini sa simentong dalan. Gidala sa ospital ang biktima apan nakabsan sa kinabuhi tungod sa naangkong bunog human milukso.
Segun ni Acala, nagkasabot na ang pamilya sa biktima nga dili na iduso ang kaso batok sa hininugma sa ilang anak.
“Wala nalang gi-file’an og kaso kay ang parents sa babae, sa iyang uyab, nagsabot nalang sila,” saysay ni Acala.
Tambag usab ni Acala nga likayan ang panag-away sa sakyanan aron malikayan ang disgrasya.
“Di gyud mag-away kung mag drive. Kay it’s either ang driver ang madisgrasya or kadtong pasahero ang madisgrasya,” tambag ni Acala.
RadyoMaN Kirby Manzon
