Pagadian City – Dako ang pagpasalamat ni Bimbo Betsuza sa mga tigpaminaw sa RMN- DXPR Pagadian ug 96.7 iFM human iyang nadawat hinabang pinansyal kagahapon sa buntag.
Si Bimbo mao ang amahan sa duha ka bata nga napaig sa sunog niadtong Pebrero 27 niining tuiga ug apohan sa laing 3 anyos nga apil sa nakabsan sa maong paulbo sa kalayo sa Brgy. Camanga, Dumalinao.
Mahinumduman nga duha ka semana nga nangaliyupo og tabang sa kahanginan ang mga RadyoMaN sa DXPR human sa maong hitabo aron itunol ngadto sa pamilya Betsuza hangtud nga nakatigom kini og kapin 3 mil nga salapi nga donasyon sa mga tigpaminaw.
Kagahapon hingpit nga giturn-over sa pamilya nga biktima ang maong cash. Uban ang iyang kapikas sa kinabuhi personal nga gidawat ni Bimbo ang tabang dungan ang pagpasalamat.
Sigon sa magti-ayon nga Betsuza ang tabang nga ilang nadawat pagagamiton alang sa pagtukod ug pagbarog sa ilang pinuy-anan.
Ang tibuok pwersa sa RMN-DXPR Pagadian nagpasalamat usab mga tigpamati sa estasyon sa kanunay nga pagsanong sa mga panawagan.
