Roxas City, Capiz – nagreklamo sa Roxas City Police Station ang konduktor sang isa ka bus matapos ginaalegar sini nga ginkawatan ini sang P7,000 sang duha ka mga GRO nga iya naka-table sa isa ka KTV Bar sa Legaspi Street, syudad sang Roxas.
Personal nga nagdangup sa mga kapulisan si Alyas Erlo kag ginsaysay sini ang nagluntad nga pagkawat sang iya kwarta.
Suno diri nga nagpadulong sila sang mga kaupod nga konduktor sa isa ka KTV bar.
Bangud aga pa ang byahe sang duha pagka-aga, nag-una sa pagpauli ang mga ini kag nagpabilin si Erlo sa amo nga KTV Bar.
Nagpadayon sa pag-inum si Erlo kag nagtable sang duha ka mga babaye, apang sang ulihi ginhagad sang mga GRO si Erlo kaupod ang isa pa gid ka agi nga magpadulong sa 24/7 convenient store agud nga magbakal sang mga groceries.
Suno sa tagreklamo nga ginbayaran pa sini ang ginbakal nga groceries sa balor nga P2,000 sa pagpati sini nga masulod na sila sa lodge sa ti-on nga mabayaran ang ginpamakal nga groceries.
Liwat nga nagbalik ang mga ini sa KTV Bar kag nagpadayon sa pag-inum, apang natulugan si Erlo kag nadula ang kwarta sini nga nagabalor sang P7,000 nga iya koleksyon nga wala pa ma-remit sa ginatrabahuan nga bus company.
Naglain ang buot sang kundoktor bangud sa pihak sang kaayo nga ginpakita sini sa nasambit nga mga GRO, natubsan pa ini nga kawatan.
(Photo from web)
