GINKUGA SANG PANYO | Babaye nasapwan ginkuga, nasapwan patay sa banyo

VICTORIAS CITY – Patay na sang makit-an sa sulod sang banyo ang isa ka babaye sa Room 1, Maria Bianca Traveller’s Inn sa De Leon St., Barangay 2.

Las 12:45 kaina sang kaagahon sang ginreport ini sa mga otoridad ni Jose Monserate, ang receptionist sang amu nga lodge nga may nakit-an sila nga isa ka tawo nga wala na sang kabuhi, gintabunan sang habol sa sulod sang banyo kag may lanog sa liog.

Nakilala ang biktima kay Jennelyn Besa, 23 anyos sang Barangay 1, Manapla.


Sa interview sang dyHB sa iloy nga si Ma. Elena, naglisensya si Jennelyn sang Biyernes para magpadulong sa Kabankalan. Nakibot nalang sila nga ara ini sa Victorias.

Si Jennelyn isa ka single mom, may bata nga Grade 1.

Sa exclusive interview sa receptionist nga si Jose, iya ginpahayag nga iya ginbuksan ang kwarto, matapos nga nag 12 hours na ang nagcheck-in nga si Jimmy, wala sang nagasabat sa pagpanuktok niya mga las singko kahapon sang hapon.

Sang nakita nya nga may ara sang bag sang babaye sa ibabaw sang katre, gilayon nya man ini nga ginsira sa pagpati nga nag-extend ang guest.

Las dose na sang kaagahon kaina sang iya liwat gintuktok ang kwarto apang wala sa gihapon sang nagasabat. Ginsulod nya ini kag gin-usisa.

Nakita ni Jose nga may habol sa sulod sang banyo, kag sang iya ginlingling, tawo ini. Ang ulo ang tawo, ara malapit sa gripo samtang ang tiil malapit sa pwertahan.

Bangod sa kahadlok, iya ini gilayon ginpatawgan sang pulis kag ginpausisa.

Nakibot sya bangod wala sang upod nga babaye si Jimmy nga nagcheck-in sa lodge sang amu nga tion.

Ang babaye ang napatay paagi naman sa kuga gamit ang panyo.

Indi man mareview sang otoridad ang hitabo bangod wala sang CCTV ang lodge.

May suspek na ang pamilya nga ila na karon gincoordinate sa mga otoridad.

Facebook Comments