Dao, Capiz – Duha ang patay sa nagluntad pagbunggu-anay sang truck kag motorsiklo sa national highway sang Barangay Manhoy, Dao, Capiz kaina sang hapon. Dead on arrival sang gindala sa Senator Gerardo Roxas District Hospital sa banwa sang Dao ang driver sang motorsiklo nga ginkilala kay Ariel Pelobello 42-anyos sang Janiuay, Iloilo kag ang backrider sini nga si Nerissa Atayde 25-anyos sang Barangay Libas, Roxas City.
Nag-angkon sang mga patal nga samad sa lawas kag ulo ang mga biktima, matapos nga ginlapak sang truck nga ginamaneho Eugene Manong 35-anyos sang Barangay Quinayuya, Dao, Capiz. Suno sa report, nga nasangit sang truck ang motorsiklo nga ginasakyan sang mga biktima rasun nga natumba kag nalapak ang mga biktima.
Boluntaryo naman nga nagsungka sa Dao PNP ang driver sang truck matapos ang aksidente. Samtang nagapadayon pa ang imbestigasyon sang mga kapulisan angut sa nasambit nga insidente.
