Isa na naman ka biktima sang pagpangluthang sang riding in tandem ang napatay sa distrito sang Jaro.
Ginkilala ang biktima nga si Gerardo Mamarion Tr., alyas Togtog, 25 anyos, residente sang Zone 5, Barangay Tacas, Jaro.
Natabu ang insidente mga alas 5 kahapon sang hapon sa Zone 4 Barangay Ungka, Jaro samtang nagabakal sa isa ka tiyangge ang biktima sang gintiro sang mga suspek.
Ginpahayag ni Police Chief Inspector Tranquilino Querubin, hepe sang Jaro PNP nga base sa ila imbestigasyon, ginsipit kag gintiro sa tiil sang gunman ang biktima kag ginpamangkot kun ano ang ngalan sini antis gintiro sa ulo kag dughan nga gintunaan sang kamatayon sini.
Suno sa amay sang biktima nga si Gerardo Mamarion Sr. nga lima ka tuig na ang nakaligad sang mag-untat na sa paggamit ng ilegal nga druga ang iya anak kag naga-drive na lamang sang traysikol bilang palangabuhian.
Padayon pa nga gina-imbestigahan sang Jaro PNP ang nasambit nga kaso.
Suno kay Querubin nga ila gina-establisar kon ano ang motibo sang mga suspek sa pagpatay sa biktima.
Suno sa iya nga isa man sa mga anggulo nga ila ginalantaw ang posibilidad nga involvement sang biktima sa illegal nga druga.
Nahibaluan nga si Gerardo Mamarion Jr. ang hinablos sang KFR member nga si John Mamarion nga napriso na sa New Bilibid Prison sa kaso nga pag-kidnap kag pagpatay sa negosyante nga si Roberta Cokin sa Bacolod City sadtong 1995.
