Patay ang isa ka lalaki nga may kaso nga rape matapos ginluthang sini lamang nga gab-i (Enero 17) sa Barangay Aguilar, san Lorenzo, Guimaras.
Ginkilala ang biktima nga si Aurelio Mission alyas Putot, 42 anyos sang nasambit nga lugar.
Ginpahayag ni Police Sr. Inspector Carl Depansos, hepe sang San Lorenzo PNP nga naga-inum sa isa ka tiyangge si Mission sang nagsulod ang suspek kag ginluthang ini sang pila ka beses kon sa diin nakaagum sang madamo nga pilas sa lawas ang biktima.
Nahibaluan nga apat tanan ang suspek sakay sa duha ka motorsiklo kag isa sa mga ini ang nagluthang sa bikltima.
Suno kay Depansos nga may kaso nga rape si Mission nga ginpasaka sang Agosto 2018 bangud sa paghimulos sa iya kaugalingon nga bata.
Sa interview sang RMN Iloilo, ginpahayag sang opisyal nga isa ini sa ila ginalantaw nga motibo sa pagpatay sa biktima.
Sa karon padayon pa ang maid-id nga imbestigasyon sang San Lorenzo PNP agud matumod ang mga suspekj kag kon ano pa gid ang iban nga motibo sa krimen.
