Ginoong Davao & Reyna Davaoeña 2019

75

Davao City – Sa labing unang higayon, gipahigayon dinhi sa syudad sa Davao ang usa ka pageant alang sa mga kalalakin-an o ginatawag nga ‘Ginoong Davao’ atol sa selebrasyon sa 82nd Araw ng Davao 2019.

Kini usa ka pamaagi aron mapakita ang katakus sa mga Davaoeños labi na sa pagpa ambit sa nagkadaiya niining adbokasiya alang sa mas ikaayo sa mga lungsuranon.

Marso 8, 2019, adlawng Dominggo, gipahigayon ang nahisgutang prestihiyosong kompetisyon sa Davao City Recreation Center o kanhi Almendras Gym ning syudad sa Davao.

Kinse ka mga kandidato ang mipadayag sa ilang adbokasiya. Pipila niini buot hataga’g importansya ang natad sa paugnat sa kusog kun sports. Aduna usay buot tutukan ang edukasyon alang sa mga batang maglisod nga maka eskwela. Aduna usay buot tutukan ang environmental protection ug eco-tourism, ug uban pang nindot nga adbokasiyang pangkalambuan.

Nahimong pinasahi ang maong male pageant human nga gi-agi og interview ug ‘fast talk’ ang mga kandidato pinaagi sa usa sa mga banggiitang judges karon walay lain kon dili ang giilang Television King of Talk nga si Boy Abunda.

Una pa man sa question-and-answer portion, nagtigi una ang 15 ka mga kandidato sa Active Wear ingon man Formal Wear Competition hangtud nga gi-anunsyo ang Top 3 nga gisalang sa interview ug ‘fast talk’ diin mi-stand out ang tubag sa usa kanila sa pangutana ni Boy Abunda kung unsa ang mamahimong kontribusyon niini sa syudad ingon man sa nasud.

Sa katapusan, gideklarang first-ever ‘Ginoong Davao 2019’ si Kyle Emmanuel Gaite, 20 anyos, nagtungha sa Ateneo de Davao University diin sa Top 3, iyahang tubag ang mi-stand out diin mi-sentro kini sa pagtutok ug paghatag og pagtagad sa mga ‘underprivileged children’ pinaagi sa pagduso sa edukasyon sa nahisgutan.

“As Ginoong Davao 2019, what I can contribute to Davao is my advocacy for the underprivileged children of Davao City because I strongly believe that if you want Davao City to progress, you must focus on the grassroots level and that is the children of Davao City.” tubag niini.

Segun ni Kyle nga kini ang pinakaunang major pageant nga iyang gi-apilan diin siya gayud ang nakakuha sa titulo. Nahimong inspirasyon usab niini ang mga misuporta kaniya labi na ang iyang mga ginikanan.

Gideklara usab isip 1st Runner Up si Cyriel Laurence Rosil nga nasakmit usab ang daghanang awards sama sa Best in Costume Parade, Best in Active Wear and Best in Formal Wear.

Samtang 2nd runner up si Abraham Yahya. Sa uban pang special awards, nakuha ni Eann Stephen Alferez ang titulo isip Friendliest Ginoo samtang most Photogenic Ginoo usab si Joart Carbonel. Gawas sa trophy, nadawat usab sa Ginoong Davao 2019 ang cash prize nga P200,000.

Samtang sa laing bahin, unang higayon usab nga gipahigayon ang pageant alang sa mga transgender women sa syudad diin gihatagan niini’g importansya ang Lesbian, Gay, Bisexual & Transgender kun LGBT community isip kabahin sa selebrasyon sa 82nd Araw ng Dabaw.

Sa maong pageant, gideklarang pinaka unang ‘Reyna Davaoeña 2019’ mao si Rojean M. Buhian nga taga Calinan, Davao City diin sa pangutana kung unsa ang usa nga pinakadakung isyu nga gina-atubang sa LGBTQ community ug kung unsaon kini nga masolusyonan, mi-sentro ang tubag niini sa diskriminasyon nga ilang padayong nasinatian diin buot niining mapaabot ngadto sa tanan ang importansya sa pagtunol ug respeto alang kanila ug aron tan-awon ang kaanyag diha sa katakus ug abilidad nga mamahimong ikapaambit sa nahisgutan diha sa komunidad.

RadyoMaN Kirby Manzon

Facebook Comments