Ginapaaligmat sang Mines and Geosciences Bureau ukon MGB 6 ang mga pumuluyo nga yara sa mga flood kag landslide prone areas sa pagsulod sang super typhoon sa Philippine Area of Responsibility buwas nga adlaw sang Miyerkules.
Sandig sa data sang MGB ang mga lugar sa Probinsya sang Iloilo nga masami nga ginabaha kag kritikal sa landslide amo ang Leon, Tubungan, Igbaras, Miag-ao, San Joaquin, Maasin, Janiuay, Calinog, Lambunao kag Alimodian.
Kalakip man ang mga banwa sang Zarraga, Pavia, Dumangas, Leganes, Barotac Nuevo, Pototan, Dingle, San Enrique, Passi City kag Calinog.
Ginarekomendar naman ni MGB 6 chief geologist Mae Magarzo sa tanan nga LGU’s nga basehan ang geo hazard maps nga ila ginpanghatag agud makaplano gilayon sang mga pre-emptive measures kag malikawan ang anuman nga casualidad.
