Nakaagum sang pilas sa wala nga kamot si alyas Carding, 53 anyos sang Dawis Norte, Zarraga matapos ginbuno sang kutsilyo sang iya anak nga si alyas Cardo, 28 anyos sa Barangay Cari Minor, Leganes kagab-i , Oktubre 18 .
Suno kay PO3 Leo Barnuevo sang Leganes MPS, nag- abot sa ila balay si Cardo nga nagapamurugso rason nga ginsaway sang amay.
Bangud naka-inom si Cardo, nagsabtanay ang duha tubtob ginbuno sang anak si Carding nga iya naman nasagang kag nag-igo sa wala nga kamot.
Ginpahayag ni Barnuevo nga luyag kontrolon ni Carding si Cardo rason nga iya ini ginlampusan sang tukon nga kawayan gani diutayan lang malipong ang anak matapos naigo sa guya.
Lunsay gindala sa hospital ang mag-amay kag yara na sa maayo nga kahimtangan.
Wala naman sang plano ang amay nga magpasaka sang kaso.
Base sa pagpangusisa sang Leganes PNP, naglain ang buot ni Cardo bangud napaslawan ini sa paghigugma matapos ginbalibaran sang babaye nga may duha ka anak ang paghigugma nga iya ginatanyag.
(photo from web/ not the actual photo)
