Luwas nga nakapauli sa ila lugar sa Barangay Napnapan, Tigbauan, Iloilo ang OFW nga si Jona Teves gikan sa Riyadh, Saudi Arabia.
Alas 5 kaina sang hapon naghugpa ang eroplano sa Iloilo International Airport nga ginsakyan ni Teves.
Nagpuli ang nasambit nga OFW nga ang bitbit amo gid lamang ang iya magamay nga knap sack kag pila ka sensilyo sa iya kahita.
Ginsabat sang LGU sang Tigbauan ang iya tiket halin sa Manila padulong sa Iloilo pinaagi sa Cebu Pacific.
Ginpasalig naman sang OWWA nga i-reimburse ang iya plane ticket halin sa Saudi padulong sa Manila.
Nahibaluan nga biktima sang pag-maltratar sang iya amo si Jona Teves kon sa diin ginpagutuman ini kag wala ginhatagan pagkaon sa sulod sang duha ka semana magluwas nga wala man ginbayaran sang iya suweldo.
Ginpahayag ni OWWA Officer I Shelly Mae Solis nga magahatag man ang OWWA sang 20 mil pesos nga financial assistance kay Teves sa idalum sang ila balik-Pinas re-integration program.
