Patay ang tatlo ka tawo matapos ginpanglabu sang ila man lamang kaupod sa pag-inum-inum sa island barangay sang Guiwanon, Nueva Valencia, Guimaras kahapon sang kaagahon.
Ginkilala ang mga biktima nga sanday Jofie Umilig, 34 anyos; Ignacio dela Cruz Jr., 36; kag si Elvic Vera Cruz, 35 anyos, lunsay pumuluyo sang nasambit nga lugar.
Samtang ang suspek ginkilala naman nga si Centil June Gamilla, 19 anyos.
Ginpahayag ni Police Chief Inspector Ali Estember, hepe sang Nueva Valencia PNP nga base sa ila imbestigasyon , natabu ang insidente mga alas 12:30 kahapon sang kaagahon kon sa diin ginpanglabu ni Gamilla ang mga biktima nga lunsay hubog na bangud sa pag-inum-inum.
Una diri, ginpahayag nga ginsugo sang mga biktima ang suspek nga magbakal sang ilimnon apang nadugayan ini sa pagbalik kabangdanan nga ila ini nga gin-akigan.
Bangud sini, naglakat na lamang ang suspek pauli sa ila balay apang lipod sa ihibalo sang mga biktima, nagkuha ini sang binangon kag nagbalik kag didto gulpi na lamang sini nga ginpanglabu ang tatlo resulta sang ila kamatayon.
Nagpalagyo naman ang suspek apang sa hot pursuit sang kapulisan, natigayon inj nga nadakpan kag kahapon sang hapon napasaka sang mga pulis ang kaso nga 3 counts sang murder batuk kay Gamilla.
