Report ni: Tita Jen Palomo Debaja
Wala pa gihapon sang klaro nga eksplinasyon tubtob subong halin sa HMO INTERNATIONAL RESOURCES kon ano ang rason sa pagka priso sang isa ka OFW sa Dammam Saudi Arabia.
Suno sa pamilya ni Cendy Paul Gonzaga, 42 anyos kag tumandok sang Malabor, Tibiao Antique, 7 days na ini nga wala sang kontak sa ila matapos may nagpahibalo nga upod sini sa trabaho nga ara siya sa prisuhan.
Sa inisyal nga impormasyon nga nabatun sang iya pamilya, kaso nga harassment ang gina pangatubang ni Paul apang wala man gindetalye sang manager sini kon sin-o kag diin natabu ang pag pangharass. Pati ngalan kag address sang prisuhan wala man gin hatag sa ila.
Nagatrabaho bilang baker/technician si Paul sa Dammam Saudi Arabia umpisa Disyembre 2015 kag nagtapos ang iya contract sang Disyembre sang nagligad nga tuig. Imbis pabakasyunon ini, gin extend sya nga wala sang sweldo. Namalibad nga indi na mag obra umpisa Pebrero kg naghatag sang request letter para mag exit na ini apang ginbalewala lang sang employer asta nagpaso na ang iya visa kg iqama.
Marso 2 sini nga tuig nagpangabay pati pamilya ni Paul sa agency nga eprocess na ang iya pag exit apang wala man sang aksyon nga ginhimo ang agency.
Abril 3 sang nagkadto na mismo si Paul sa POLO ( Philippine Overseas Labor Office ) Sa Dammam agud mag reklamu kag amuman atu ang katapusan niya nga kontak sa iya pamilya asta gin pahibalo na sa ila nga napriso na ini.
Sa karon, kabalaka kag kahangawa ang nabatyagan sang himata ni Paul kag nagalaum nga mangin okay lang siya kag makapauli sa gilayon.
