Mabaskog nga ginpakamalaut ni Police Regional Office 6 director Chief Supt. John Bulalacao ang ginlunsar nga landmine attack sang mga rebelde nga NPA kahapon sang aga sa banwa sang Leon, Iloilo.
Ginhatagan pagtamod ni Bulalacao nga apisar menor lamang nga kapilasan ang naagum nanday Police Chief Inspector Abner Jordan, hepe sang Leon PNP kag PO2 Rosenie Lebuna, apang ang paggamit sang landmine sang mga rebelde ang isa ka paglapas sa R.A. 9851 ukon ang Phil. Act on Crimes against International Humanities, genocide kag crimes against humanity.
Ginpat-od ni Bulalacao nga mabakod ang panindugan sang gobyerno nga ipatuman ang kasuguan kag katawhayan sa bilog nga pungsod.
Ginpasiguro man sini nga magapangatubang sang consequencia ang mga rebelde nga grupo nga nagkomiter sang nasambit nga krimen.
Angut sini, gin-panawagan ni Bulalacao ang publiko nga mangin mabinantayon sa tanan nga tion kag i-report sa kapulisan ang ano man nga presensya sang mga makaduluda nga mga tawo sa ila lugar.
Gin-engganyo man sini ang mga rebelde nga magbalik sa sabak sang gobyerno kag magpangabuhi sang matawhay upod sa ila pamilya kag magbulig sa nation building.
