Patay na sang mag-abot sa ospital ang iloy sang puluy-an matapos nag angkon sang multiple nga igo sang armas luthang sa iya sini nga lawas. Natabo ang insidente pasado las 7 sang gab-i, Hulyo 2 sa Purok Bougainvilla, Barangay Pandanon Silos banwa sang Murcia.
Sa imbestigasyon sang Murcia PNP, may duha ka suspek nga nagsulod sa puluy-an sang mag asawa nga Marites Mondejar, 51 anyos kag Manny Mondejar, 49 anyos sang nasambit nga lugar para mag pamangkot sang dota nga ginabaligya sang mag-asawa, apang sang yara na sa sulod sang compound sang mag asawa ang duha ka suspek hinali na lang nga ini sila ang gin pangluthang nga gintunaan sang pagkaigo ni Marites.
Tigayon naman nga nakalikaw ang bana nga si Manny, kag iya pa naagaw ang armas sang suspek kag nadakpan pa ini.
Ginkilala ang suspek kay Nicolie Terambulo, 21 anyos sang Purok Acacia, Barangay 1, San Carlos City nga detained subong sa custodial facility sang Murcia Police Office, samtang naka palagyo naman ang upod sini nga ginkilala kay alyas Dodong sakay sa motorsiklo.
Narecover sa crime scene kag sa suspek ang 45 cal. pistol, lima ka bala kag sling bag nga may unod sang 2 ka cellphones.
Samtang, kunplikto sa duta ang nalantaw nga motibo sa krimen.
[image: image.png]
