Dumalag, Capiz – Ginsunog sang mga armado nga kalalakinhan ang isa ka heavy equipment (pison) sang isa ka construction firm sa Barangay San Martin, Dumalag, Capiz ala 1:30 ang takna kahapon sang hapon. Ini ang ginkumpirmar ni Lt. Col. Sisenando Magbalot, Commanding Officer sang 61st Infantry Battalion, Philippine Army.
Suno diri nga mga katapo sang New Peoples Army ang responsible sa pagsunog sang nasambit nga heavy equipment. Ginpahayag man sini nga grupo ni Ka Bobong sang Central Front Committee nga naga-operate sa mga kabanwahanan sang Tapaz, Dumalag kag Calinog ang nagpangamot sang amo nga pagpanghalit. Base sa imbestigasyon sang militar, naglab-ot sa kapin 15 ka mga armado nga persona ang nagpadulong sa nasambit nga barangay.
Nagapati si Magbalot nga wala nakakuha sang extortion money ang NPA sa nagapanag-iya sang amo nga equipment rasun nga ginsunog ini. Nahibaluan nga ginagamit ang amo nga heavy equipment sa pagkay-o sang karsada sa amo nga lugar. Wala pa sang may ginpagwa nga pagpahayag ang mga katapo sang NPA angut sa nasambit nga insidente.
