CANDONI, NEGROS OCCIDENTAL – Ginmando na sang chief of police sang Candoni Municipal Police Station ang madalum nga imbestigasyon sa natabo nga pagtiro patay kagab-i sa isa ka barangay kagawad sang Brgy. Gatuslao sa amo nga banwa.
Ang biktima nga nakilala kay Brgy. Gatuslao Kagawad Willie Castor, 58 anyos ang edad kag isa ka first termer nga barangay kagawad ang gintiro sang 2 ka wala makilala nga suspek pasado las 7 kagab-i sa amo nga lugar.
Suno sa hepe sang Candoni PNP nga si PS/Insp. Jaynick Bermudez nga ang ini nga insidente ang iya ginkakibot bangud nga humalin sang bulan sang Enero, zero crime rate ang banwa ukon wala sang may na-record nga kreminalidad.
Pahayag pa ni Bermudez nga bisan sang nakaligad nga eleksyon, siya mismo ang nagpanguna sa pagbantay sa Brgy. Gatuslao humalin sa pagsugod sang botohay tubtub matapos kag nangin peaceful ang lakat sang Barangay kag SK election.
Bangud sini, gilayon nga nagpadala sang imbestigador si Bermudez sa amo nga barangay agud nga matutukan kag mahatagan hustisya ang kamatayon sang amo nga kagawad./dyHB BACOLOD
