Davao City – Aduna na’y dan-ag dyutay ang motibo sa pagpatay sa kanhi manager sa bangko kinsa giluthang sa suspek nga nagsakay og puti nga Avanza gahapon sa buntag.
Gikunsidera anaa sa regional drug watchlist #13 ang biktima nga si Edward Te, kanhi manager sa usa ka dakong bangko ug residente sa Jade Valley, Tigatto, Buhangin District ning siyudad.
Apan suma ni Buhangin PNP Chief Police Major Roy Mateo nga dili pa nila makumpirma kung may kalambigitan ba sa droga ang krimen sanglit lakip gisusi sa ilang imbestigasyon ang posibling bangi dihang manager pa kini sa usa ka dakong bangko.
Sa inisyal nga imbestigasyon nga musakay na unta sa iyang sakyanan si Edward dihang kalit mihunong ang Avanza ug kalit namusil ang sakay niini.
Nakahimo pa og dagan ang biktima nga samdan na sa ilok nga bahin pasado 5:00 sayo sa buntag gahapon adlawa.
Daling gidala sa pribadong ospital sa Bajada si Edward apan patay na kini nahidangat subay sa deklarasyon ni Dr. Tan.
Ang mga sakop sa Scene of the Crime Operatives kun SOCO 11 nakarekober og lima ka basyo sa bala sa gihitaboan.
Sa karon, blangko pa ang mga otoridad sa armado nga mipusil patay sa biktima.
RadyoMaN Joel Viray
