Davao City- Usa ka pares sa tsinelas sumala pa ang hinungdan maong nakahiagum og samad dinunggaban ang usa ka construction worker human gidunggab sa nakalalis niini nga silingan.
Base sa report sa kapulisan, giila ang biktima nga usa ka Danny Helan Ellazar, 22 anyos, usa ka construction worker ug residente sa may Purok 7-B, Inabangga Bunawan ning syudad sa Davao.
Nahitabo sumala pa ang pagpanunggab sa nasangpit nga lugar bandang alas 9 kagabii sa dihang nakalalis niini ang iyang silingang giilang si Andy Anunciado tungod lang sa usa ka pares sa tsinelas sa suspek nga nagduda kini nga gibinuangan ug gitaogan sa mga kainom.
Misangpot kini sa away ug mikuha matud pa ang suspek og kutsilyo ug gisundan ang biktima samtang pauli ug gidunggab ang biktima.
Gitabang gilayon sa mga kabanay ang biktima ug gidala sa Southern Philippines Medical Center samtang ang suspek daling misibat sa wala matino nga direksyun nga ginapangita na karon sa mga otoridad.
RadyoMaN Paul Canono
