Patay ang isa ka membro sa mga armadong lalaki, kinsa gituohang mga sakop sa New People’s Army, dihang na-engkwento niini ang tropa sa 49th Infantry Battalion, duha ka higayon niadtong Sabado, Abril 24.
Nahitabo kini buntag ug hapon didto sa bukirang bahin sa Barangay Buntalis, lungsod sa Lumba-Bayabao, Lanao del Sur.
Matud pa ni Col. Jose Maria Cuerpo, commander sa 103rd Infantry Brigade, nahitabo ang maong engkuwentro tungod sa impormasyon ug taho sa mga concerned citizen ug nakuhang intelligence report nga nagkampo ang mga armado sa dapit.
Gibiyaan sa mga kauban sa ilang pagsibat ang patay’ng lawas sa usa nila ka kauban apan matud pa ni Cuerpo, gilubong ra usab kini didto sa mga sundalo pinaagi sa usa ka desenteng lubong isip respeto sa tawhanong katungod sa namatay.
Nakuha sa gikampuhan sa mga rebelde ang klase-klase mga bala ug armas, lakip na sinako nga bugas nga gituohang kunsumo sa mga armado.
Walay mga residente sa area apan dunay mga bata nga gitouhan mga paryente kini sa maong mga rebelde.
Walay indikasyon nga mga fighters ang maong mga bata tungod kay gawasnon man sila nga nakasuroy-suroy sa dapit nga walay mga armas nga dala.
Tungod niini, nanawagan si Cuerpo ngadto sa mga nagbitbit sa maong mga bata nga ilang i-turn over kini sa pinakaduol nga mga sitio leader aron matabangan sa militar nga ma-uli kini ngadto sa ilang pamilya.
Sa ilang gihimong pursuit operation, “selective fires” ang gibuhat sa militar aron dili maangin ang maong mga bata. (Divina M. Suson, Lanao del Sur, April 27)
