Davao City – Walay laing nakita nga rason ang Interface Development Interventions (IDIS) sa pag-alburoto karon sa bulkang Mayon sa probinsiya sa Albay gawas sa sobra kainit sa panahon karon dala sa global warming.
Gipasabot ni IDIS focal person Chinkie Golle nga ang sobra kainit sa kalibutan karon magpasamot sa presyur sa kayutaan ug ang usa sa epekto niini mao ang pag-alburoto sa bulkan diin ang lava mangita og outlet aron mabuswak.
Segun ni Golle, ang nahitabo sa Mount Mayon natural nga reaksyon sa climate change ug gani gawas sa pagbuto sa bulkan, ang global warming maghatud usab sa linog ug pagbundak sa ulan ug walay laing ma-basol ani tanan kundi ang mga tawo ra usab.
GIkanayon ni Golle nga alarming na kaayo ang mga kalamidad nga nagapanghitabo sa kalibutan kay ang tanan may koneksyon kini sa climate change ug walay moderno nga kagamitan makapugong sa impact sama sa tonelada nga lava nga ginabuga karon sa bulkang Mayon.
Aron dili mabutang sa peligro ang kinabuhi sa mga tawo, gikinahanglan magpatuman og evacuation ang kagamhanan sa mga nanimuyo duol sa impact sa kalamidad sama sa bulkang mayon aron masalba pa ang ilang mga kinabuhi.
Gitambagan ni Golle ang publiko sa angay buhaton panahon sa kalamidad aron dili madisgrasya sama sa pagpaminaw ug pagsanong sa ‘forced evacuation’ aron maluwas gikan sa bung-aw sa kamatayon nunot pag-alboroto sa atong kinaiyahan sama sa bulkang Mayon.
Gidasig sa focal person ang mga ahensiya sa gobyerno ug ang lokal nga kagamhanan nga maglusad og ‘disaster preparedness education campaign’ sa mga kabarangayan aron mutaas ang kahibalo sa mga tawo sa angay nilang buhaton sa pit-os nga panahon.
Sa obserbasyon ni Golle, nakakat-on na ang kagamhanan ug ang publiko gumikan sa mga kalamidad nga miigo sa daghang lugar sa nasud diin nilampornas sa daghang mga lungsod ug mikutlo og daghang kinabuhi sama sa nahitabo sa Davao Oriental ug Comval niadtong 2012.
RadyoMaN Joel Viray
