Davao City – Produkto sa Good Manners Right Conduct kun GMRC subject ang gibaton karon nga pamatasan sa mga nag-edad og 40 anyos dihang sila pa ang mga nahimong estudyante sa elementarya ug sekondarya sa kapin duha na ka dekada nang nakalabay.
Apan sukwahi ang mga bata kun mga estudyante karon nga wala na’y batasan kay bisan sa simply nga pangayo og katahuran sa mga hamtong dili gayod makabungat sa dungganon nga pulong gikan kanila.
Si Alliance for Concern Teachers Davao Chapter President Reynaldo Pardillo nakasaway og maayo sa ka walay batasan na karon sa kabataan kay bisan siya mismo nakasinati niini sa pipila ka mga estudyante.
Ang ka-walay batasan sa mga estudyante kun sa mga kabataan karon bunga matud pa kini sa Juvenile Justice Law ni Senador Kiko Pangilinan, pag-adaptar sa kultura sa Western, ug sayo nga pag-expose sa internet ug uban pa.
Naglisod ang mga magtutudlo sa pagdisiplina sa mga badlungong estudyante tungod sa kabalaka nga basin makasohan sila gumikan sa Pangilinan Law mao nang bisan og inudnod pa ang pagtudlo sa maayong pamatasan walay epekto ngadto sa mga kabataan, matud ni Pardillo.
Sa siyam ka klase sa Quotient, upat ka quotient ang dapat pakusgan ug batonan sa kadaghanan nga mahulma gikan sa pagkabata ug kini mao ang Intelligent, Social, Emotion, ug Adversity Quotient.
Apan sa upat, labing mahinungdanon hatagan og pagtagad ug palambuon ang Social, Emotion, ug Adversity Quotient kay mao kining mga elemetoha ang muhulma sa maayong pamatasan samtang mag dako ang usa ka bata.
Subay sa pagtuon, ang mga tawo nga brayt kasagaran dunay problema sa kinaiya ug kini sagad makita ug masinati sa ilang inadlaw-adlaw nga tinagdanan sa ubang mga tawo sa ilang palibot.
Sa karon nga panahon, daghan sa mga kumpanya ang wala na gatan-aw sa ka-bright sa aplikante apan ang ginabasehan mao ang maayong pamatasan ug kini maangkon lamang kung na-develop ang tulo ka matang sa quotient nga gikinahanglan.
Busa dakong kalipay ni Pardillo ang giduso sugyot balaudnon nga giduso karon sa kongreso nga ibalik na og tudlo ang GMRC sa kindergarten hangtud sa grade III level sanglit gikinahanglan gayod karon nga mabalik ang maayong pamatasan sa mga kabataan karon.
RadyoMaN Joel Viray
