Gimandoan ni Governor Bambi Emano si Provincial Veterinarian Dr. Benjamin Resma nga i- quarantine ang mga Itikan sakop sa Misamis Oriental.
Kini alayon sa Bird Flu outbreak sa pipila ka mga poultry farm sa Pampanga diin gibalak-an kining mokaylap sa uban pang mga dapit.
Gikasubo sa gobernador ang maong panghitabo apan sa laing bahin, mao matud pa kini ang tsansa sa mga dunay itikan sa lalawigan nga modako ang ilang kita sa posibilidad nga dinhi na mokuha’g supply ang taga Luzon.
Gibutyag sa gobernador nga mokabat sa 500 thousand ang ihap sa gikinahanglang itlog sa itik sa lalawigan matag semana apan moabot lamang sa 50 thousand ang supply.
Nasayran nga dunay 148 ka mga Itik growers gikan sa pito ka mga lungsod sa lalawigan nga gilangkoban sa Kinoguitan, Jasaan, Villanueva, Balingasag, Lugait, Tagoloan ug Libertad. Nagtoo usab ang opisyal nga dili maapektuhan ang mga itik sa lalawigan tungod kay hugot man ang ilang pag-monitor ilabina sa palibot diin nahimutang ang nasangpit nga mga binuhi.
By: Lovelyrose Sambaan
