Subling giklaro sa Task Force Bangon Marawi nga walay pribadong yuta sulod sa ground zero sa Marawi City ang ilogon sa gobyerno.
Sa pamahayag nga gipagawas sa TFBM, pinaagi sa ilang website, giklaro nga wala usa’y hilabtan ug walay madaut nga pribadong balay, sa pagsugod sa rehabilitasyon niini sa Hunyo.
Human, matud pa, sa debris clearing, isunod ang pag-develop sa mga istruktura ug gambalay nga iya sa gobyerno ug mahimo na’ng makabalik og puyo sa ilang kanhi lugar ang mga residente.
Una nang nabalaka ang mga lumulupyo, ilabina niadtong gikan sa ground zero, nga dili na sila makabalik og puyo sa ilang barangay, tungod sa pagtoo nga angkonon na kini sa gobyerno.
Miingon ang TFBM nga ang mga wala madaut ug mga adunay gamay’ng kadaut nga mga balay o mga pribadong building, dili kini hilabtan sa clearing team.
Sa nakalabay’ng press conference sa TFBM didto sa Marawi, miingon si Housing Assistant Secretary Felix Castro, ang field office manager sa TFBM, nga atol sa debris clearing, kung adunay mga residente nga bu-ot ipaapil og paguba ang ilang balay o building, mahimong makig-coordinate lang sa TFBM.
Nagpasabot nga guba-on lamang og apil ang mga pribadong istruktura kung adunay pagtugot sa tag-iya. (Divina M. Suson)
