photo by: Divina Suson
Dili na mogamit ang gobyerno og joint venture agreement isip modality alang sa rehabilitasyon sa most affected area sa Marawi City.
Matud pa ni Housing Secretary Marcelino Escalada, Jr., secretary-general sa Housing and Urban Development Coordinating Council, gibasura na nila ang unang plano nga joint venture agreement tungod kay sundon na sa gobyerno ang Republic Act 9184 o ang Government Procurement Law.
Pinaagi niini, mamalit ang Task Force Bangon Marawi sa tanang mga project components pinaagi sa public bidding.
Pinaagi niini, ang National Housing Authority o NHA nalang ang ahensiya nga maoy mamahimong responsableng ahensiya nga mohimo sa debris management isip maoy nag una ug pinakadakung component sa rehabilitasyon.
Ang ubang 20 ka mga components himoon sa mga departamento ug mga ahensiya sa gobyerno nga gihatagan na sa ilang mga mandato.
Kung kahinumduman nga nagsugod na unta niadtong Disyembre ang Finmat International Resources, Inc. sa pag-demolish sa mga istraktura sa area 1 sa most affected area aron pagsugod sa pisikal nga rehabilitasyon.
Apan nagpagawas og kamandoan ang NHA nga ipa-undang una kini nga trabaho tungod sa reklamo sa mga residente nga gi-demolish ang ilang mga balay bisan nga wala silay pagtugot niini.
Una nang gipamahayag sa kontraktor nga Finmat nga ang mga istraktura lamang nga adunay waiver o consent ang ilang gi-demolish ug adunay personahe sa NHA nga nagtan-aw sa ilang trabaho. (Divina M. Suson)
